نصائح بسيطة بشكل عام حتى تستفيدوا منها :
1- السنة التحضيرية اكثر سنة مليانة اشاعات، لا تسمعي لكلام الاخرين، السنة التحضيرية مو صعبة ولا سهلة جدًا تحتاج جهد و ذكاء اكيد بعد التوفيق من ربنا.
2- مذاكرة قبل الاختبار بيوم لها نتيجة وحدة و هي تخصصك يضيع بين يدك .
نظمي وقتك و زاكري اول بأول.
3- احيطي نفسك بناس ايجابية و متفائلة، البيئة الطيبة تنتج ناس طيبين.
4- اذا اتعرضتي لدكتورة سيئة، و ما قدرتي تفهمي منها ابدًا عندك ٤ حلول :
– تحولي رسمي من عندها، و دا الشي صعب، لازم في اول اسبوع في الدراسة و لازم تجيبي لهم اسبابك للتحويل و يكون من عند العمادة.
– تحولي حبي، تروحي للدكتورة الي تبغيها و تشوفي مواعيد كلاسها و اذا ممكن تقبلك، اذا رضيت، تكلمي دكتورتك الاصلية انو تسير الدكتورة التانية تاخد حضورك و غيابك و لكن اسمك فعليا يبقى مسجل عند حقتك الاصلية.
– تحضري اكسترا، في حال دكتورتك الرسمية ما رضيت تحولي من عندها حبي، حاولي تحضري اكسترا مع الاستاذة الي تبغيها، يسير تحضري مع دكتورتك الرسمية عشان الحضور و الغياب، و كمان مع الدكتورة اللي تبغيها بس عشان تفهمي.
– لو ما يمديكي تحضري اكسترا او منتي قادرة تفهمي برضو، خدي خصوصي ..مهو عيب ولا غلط..هي سنة وحدة.
5- لا تحكموا على دكاترتكم من كلام الناس، ممكن الي ما تفهم غيرك، انتي تفهمي منها و العكس صحيح، جربيها بنفسك و بعدها شوفي كيف تبي تتصرفي.
6- اطمحوا للدرجة الكاملة اي 100 مو A+ ، لأن القبول بالنسبة وليس بالمعدل لهذا السبب 100 تختلف عن 95 او 97 ولتوضيح طريقة حساب النسبة يوجد شرح مفصل في صفحة التسكين.
7- استغلي السنة في تطوير مهارة التعليم الذاتي و هي مهارة مهمة لانو في الثانوي كثير من الطالبات متعودين على الحذف و التأشير، هنا انتِ حتتعلمي كيف تأشري بنفسك لنفسك و اذا شي ما فهمتيه ابحثي في اليوتيوب عن شروحات.
8- صح السنة التحضيرية سنة كأنها منافسة على التخصصات، بس مساعدتك لغيرك ممكن ترزقك درجات و نعم في حياتك انتي ما كنتي تتخيلها، مساعدتك لغيرك ما تنقص من فرصة دخولك للتخصص الي تبيه.
9- لغتك الانجليزية تضيف لك مرونة و سهولة في دي السنة و هي فعليا مهمة في حياتك الجامعية فحاولوا تطوروا لغتكم الانجليزية في الصيف.
ملحوظة: في طالبات مستواهم متوسط الى شبه ضعيف في الانقلش و جابوا درجات عالية ماشاءالله، الفكرة في الجهد المبذول و التركيز.
10- اذا قدرتي تعادلي الانقلش بالايلتس او التوفل عادليه بدون اي تفكير ووضحنا طريقة المعادلة في موضوع منفصل خاص بها في قسم المواد. * للمعلومية أغلب الي بيكتبو دي المدونة معادلينه*
11- لا تدخلي الاختبار و انتي في اشياء مو فاهمتها .. اي سؤال يراودك اسألي الدكتورة روحي لها في الساعات المكتبية.
12- سر المزاكرة هي المزاكرة الذكية، دائمًا و ابدًا فكري بتفكير الدكتورة لا تفكري بتفكيرك كطالبة، لو كنتي دكتورة المادة ايش الاسئلة الي بالفهم ممكن تحطيها للطالبات ؟
13- في المواد العلمية انصحكم انكم تكتبو ملاحظاتكم *نوتس* اثناء الكلاس.. يثبت لكم المعلومة و يجعلك منتبهة للإشارات الي تقولها الدكتورة في كلامها.
14- بعض الطالبات واجهوا ازمات او صعوبات كبيرة في السنة التحضيرية و هم قلة، و شاء الله انهم يسحبو من التحضيري و يرجعوا يقدموا السنة الي بعدها كطالبات مستجدات، فا توجد امكانية لإعادة السنة التحضيرية، بس لا تعمتدي دي الخطة في بالك.
14- كثير بنات يكونو فاهمين طريقة الحل بس ما يقدروا يحلو و السبب انهم ما يفهموا ايش المطلوب من السؤال، فعشان كده جزء من مزاكرتك هي انك تفهمي المطلوب و بعدها تحلي، لا تقولي فاهمه الحل و تنسي السؤال حق الحل.
15- اهمالك للمحاضرات مو فلة وحيضرك اكثر من انه ينفعك.
16- يوجد مواقع مهمة جداً لكِ كطالبة حتعرفي اكثر عنها في صفحة مابعد القبول.
السنة المصيرية 